Nemo qərarını İnstaqram hesabından paylaşdığı video ilə elan edib.
26 yaşlı müğənni, mükafatın artıq rəfində olmaması lazım olduğunu düşündüyünü bildirərək bunları söyləyib:
“Birləşmiş Millətlər Təşkilatının (BMT) müstəqil beynəlxalq təhqiqat komissiyasının soyqırım nəticəsinə gəldiyi bir dövrdə, İsrailin müsabiqədə iştirak etməyə davam etməsi, bu ideallarla EBU-nun (Avropa Yayım Birliyi) qəbul etdiyi qərarlar arasında açıq bir ziddiyyət olduğunu göstərir. Bütün ölkələr geri çəkildikdə, nəyinsə səhv olduğu aşkar olmalıdır. Buna görə də mükafatı aydın bir mesajla Cenevrədəki EBU-nun baş qərargahına göndərmək qərarına gəldim. Sözünüzə sadiq qalın. Səhnədə qeyd etdiyimiz dəyərlər, səhnə xaricində yoxdursa, ən gözəl mahnılar belə mənasızlaşır. Söz və əməllərin bir-biri ilə uyğun gəldiyi anı gözləyirəm, o vaxta qədər bu mükafat sizindir.”
Beş Ölkə Avroviziyadan Çəkilmək Qərarı Vermişdi
Avroviziya Mahnı Müsabiqəsi 2026-cı ildə Avstriyanın paytaxtı Vyanada keçiriləcək.
İsrailin müsabiqədə iştirakının ötən həftə rəsmən təsdiqlənməsindən sonra İrlandiya, İspaniya, Sloveniya və Niderland müsabiqədən çəkilmişdi. Dünən İslandiya da bu ölkələrə qoşuldu.
İsrail, ictimai yayımçısı Kan-ın EBU üzvü olması səbəbindən 1973-cü ildən bəri Avroviziyada iştirak edir. Müsabiqəni indiyədək dörd dəfə qazanıb.
İsrail adından 2025-ci ildə 7 Oktyabr hücumlarından sağ çıxan Yuval Rafael yarışmışdı. Rafael hücumdan əvvəl peşəkar müğənni deyildi. Müsabiqədə isə xalq səsverməsini birinci yerdə tamamlamış, münsif xallarında 14-cü olaraq ümumi sıralamada ikinci yerdə qərarlaşmışdı.