Video redaktə şirkəti Kapwing tərəfindən aparılan araşdırma məlum edib ki, YouTube-un yeni istifadəçilərə təklif etdiyi videoların 20 faizindən çoxu “AI slop” (süni intellekt zibilliyi) adlandırılan məzmunlardır.
Bu araşdırma göstərir ki, YouTube alqoritmi yeni istifadəçilərə baxış sayını artırmaq üçün süni intellekt tərəfindən yaradılmış aşağı keyfiyyətli videoları ("AI slop") geniş şəkildə təqdim edir.
İllik 117 milyon dollar gəlir əldə edilir
Şirkət araşdırma çərçivəsində hər ölkədən ilk 100 kanalı seçərək dünyanın ən populyar 15 min YouTube kanalını təhlil edib. Bu kanallardan 278-nin tamamilə süni intellekt tərəfindən istehsal olunan məzmunlar paylaşdığı müəyyən edilib. Proqnozlara görə, bu növ kanallar ümumilikdə 63 milyarddan çox baxış və 221 milyon abunəçi toplayaraq hər il təxminən 117 milyon dollar gəlir əldə edir.
İlk 500 videonun 104-ü süni intellekt məhsuludur
Yeni bir YouTube hesabı açan tədqiqatçılar onlara tövsiyə olunan ilk 500 videodan 104-nün süni intellekt istehsalı olduğunu aşkar ediblər. Həmin 500 videonun üçdə birinin isə yalnız gəlir əldə etməyə yönəlmiş "AI slop" və bənzəri aşağı keyfiyyətli məzmunları əhatə edən “Brainrot” (beyin çürütmə) kateqoriyasında olduğu görülüb.
Ən sürətlə böyüyən kanalların 10 faizi süni intellekt istifadə edir
The Guardian qəzetinin apardığı son analiz də göstərir ki, YouTube-un ən sürətlə böyüyən kanallarının təxminən 10 faizi süni intellekt tərəfindən yaradılan videolardan ibarətdir. Platformanın saxta və qeyri-real məzmunu əngəlləmək cəhdlərinə baxmayaraq, bu kanallar milyonlarla baxış toplayır.
• İspaniyada: 20 milyon nəfər trend olan süni intellekt kanallarını izləyir.
• Misirdə: 18 milyon abunəçi.
• ABŞ-da: 14,5 milyon abunəçi.
• Braziliyada: 13,5 milyon abunəçi bu kanalları təqib edir.
Ən çox izlənən “AI slop” kanalları
• Bandar Apna Dost (Hindistan): Ən çox izlənən kanal hesab olunur və illik gəlirinin 4,25 milyon dollara çatdığı təxmin edilir.
• Puty Frenchie (Sinqapur): İki milyarddan çox baxış sayına malik olduğu iddia edilir.
• Cuentos Facinantes (ABŞ): Araşdırmada ən çox abunəçisi olan kanal kimi önə çıxır. Cizgi filmi üslubunda hekayələr təqdim edən kanal uşaqları hədəf alır və 6,65 milyon abunəçisi var.
• The AI World (Pakistan): Ümumi baxış sayı 1,3 milyardır. Kanal Pakistandakı fəlakətli sellər haqqında qısa videolar dərc edir.